9 de maio de 2008. Nunha recente xuntanza da Plataforma Galega Antitranxénicos (PGA) coa Consellaría do Medio Rural, o conselleiro evitou comprometerse públicamente con respecto aos transxénicos, rexeitando publicar a listaxe de empresas que distribúen OXMs así como dar pulo á declaración de Galiza como territorio libre de transxénicos. Portanto a PGA, da que fai parte ADEGA, inicia unha campaña nacional co envío masivo de mocións aos concellos para conquerir a aprobación polos plenos do territorio municipal como Zona Libre de Transxénicos e o apoio a iniciativas para frear a entrada e a extensión dos OXMs no país. Moción TRANSXÉNICOS

 

10 de maio de 2008. Ramil (Agolada). Con este Iº curso de formación queremos poñer en marcha un dos recursos fundamentais do proxecto Aldeaverde-Eira da Xoana: o CURRUNCHO DA ESTERQUEIRA. A actividade formativa, que pon en valor unha prática tradicional de reciclaxe da materia orgánica, pretende desenvolver os coñecementos e as actitudes precisas para a capacitación de educadores e voluntariado ambiental. Neste curso trataranse, entre outros contidos, que é a compostaxe e o compost, tipos de composteiros, beneficios do compost, coidados básicos, problemas e solucións… e construiremos diferentes tipos de composteiros. Baixa o MAPA de situación

 

8 de maio de 2008. Este mércores día 7 voluntarios/as de ADEGA démonos cita na praia da Corna para comezar os labores de recuperación ambiental deste contorno. No comezo da xornada, e logo dun percorrido interpretativo pola área dunar, colocamos varios cartaces informativos para solicitar a colaboración cidadá e preservar, en vésperas do Día Mundial das Aves, a única niñada de píllara papuda (Charadrius alexandrinus) deste ano. Posteriormente, traballamos na erradicación de especies exóticas, concretamente da herba do coitelo (Carpobrotus) situada preto do rego de Esteirón. Estes traballos terán continuidade en vindeiras xeiras, especialmente na época do verán cando aumenta a afluenza de visitantes á praia.

 

Este mércores día 7 ADEGA retoma as actividades de voluntariado ambiental do PROXECTO CORNA, adiadas en abril.  Traballaremos na eliminación das especies exóticas que ameazan a biodiversidade desta área dunar (Carpobrotus-herba do coitelo e Cortaderia-herba da Pampa, entre outras). Desta volta realizaremos tamén labouras de protección da píllara papuda (Charadrius alexandrinus). O pasado ano, a presión turística estragou as dúas únicas niñadas desta especie protexida e por iso trataremos de preservar a única posta localizada até o momento. Colabora con ADEGA na defensa do noso patrimonio natural!

Baixa o CARTAZ da actividade.

 

5 de maio de 2008. A noticia da concesión da Autorización Ambiental Integrada ao complexo de ENCE-ELNOSA por 3 anos é unha vergoña e un insulto á cidadanía de Pontevedra e de Galiza. Lonxe de supoñer "o comezo de desmantelamento e do traslado" SIC, como afirma o conselleiro, esta concesión ratifica a intención de ENCE de manterse en Lourizán a toda costa e a falla de vontade da Consellería de M. A. por defender o ambiente e a saúde. Como se pode dar a razón a unha empresa condeada por delicto ecolóxico en 2002 e que continua incumprindo moita da lexislación ambiental de aplicación? Como se poden desouvír as demandas dunha cidadanía que leva anos denunciando esta situación e reclamando o que as administracións non se atreven: ENCE fóra da ría... AGORA!

 

2 de maio de 2008. VERTIDO DE GASÓLEO AO MIÑO. Unha vez máis vemos como as empresas públicas (desta volta ADIF) e as administracións son as responsaábeis de delictos medioambientais que quedan impunes. A desidia dos directivos de ADIF permite que unhas instalacións obsoletas provoquen desde hai anos verteduras intermitentes de gasoil á rede de sumidoiros de Ourense. Unha avaría provocou un escape masivo que destapou as condicións calamitosas deses talleres. Din que “quen contamina paga”. Se ADIF é condeada... pagaremos todos/as cos nosos impostos! Texto da DENUNCIA de ADEGA.

Un artigo de Luis Díaz Cabanela, médico e vogal de saúde ambiental de ADEGA. 

 

2-4 de maio de 2008. A agricultura ecolóxica está chamada a ser o motor da transformación do mundo rural. Con este II CONGRESO (programa) quérese abrir un espazo de debate e información que permita a posta en común dos principais desafíos e oportunidades aos que se enfronta a agricultura ecolóxica en Galiza. Por unha banda, quérese impulsar o Congreso como referente galego da investigación teórica e aplicada en agricultura ecolóxica. Por outra, aposta por dar voz a aqueles/as labregos/as e gandeiros/as que se enfrontan a cotío ao repto da supervivencia mediante estratexias socialmente activadoras, ambientalmente correctas e economicamente rendíbeis.

 

1 de maio de 2008. A veciñanza afectada pola construción das piscifatorías na Costa da Morte mobilizouse este 30 de abril diante da piscifatoría de Quilmas (Carnota). Portestábase pola falla de información sobor do vertido denunciado por ADEGA e a Plataforma de Quilmas o pasado 3 de marzo. O vertido, con grandes cantidades de pensos, procedía da piscifatoría de Stolt Sea Farm en Quilmas e foi denunciado ante o Seprona, cuxos axentes tomaron mostras dos vertidos do emisario da piscifatoría. Pasados dous meses dende a denuncia e a solicitude dos resultados das análises, nin ADEGA nin a veciñanza recibiron aínda información, que a administración está obrigada a proveer pola Lei 27/2006 de Información Ambiental. ADEGA xa enviou unha queixa ao Valedor do Pobo para que vele polo respecto aos dereitos fundamentais dos cidadáns, quer o dereito á información. Texto da queixa

 

30 de abril de 2008. As emisións de CO₂ aumentaron un 20% en Galiza no 2006 con respeito a 1990, ano de referenza do Protocolo de Quioto. Nos sectores regulados, as empresas galegas ultrapasaron en 2007 as cuotas de emisión un 40,2% con respeito ao 2006, debido á renuencia e insubmisión de FENOSA e ENDESA, que van por libre. Só a térmica de Meirama aumentou máis dun 33% as súas emisións. Fronte a esta evidente falla de compromiso e insolidariedade das térmicas, o governo galego pretende intervir sobre as emisións difusas (transporte, residencial, residuos...) cun Plano de Acción contra o Cambio Climático. É esta unha medida necesaria, mais claramente insuficiente: as térmicas son as que deberían facer o maior esforzo por emitir menos dada a súa reponsabilidade no cambio climático. Pero... Quen lle vai pór o axóuxere ao gato?