4 de febreiro de 2010. O Proxecto Ríos ven de apresentar, conxuntamente coa Universidade da Coruña, un programa de promoción do voluntariado no seo de dita universidade. Dentro do Programa de Promoción do Voluntariado Ambiental para o alunado da UDC, o Proxecto Ríos deu conta das actividades e propostas que se están a desenvolver con alunos e alunas dos campus de Elviña e A Zapateira. Estas actividades están relacionadas coa custodia do territorio, unha nova ferramenta en educación ambiental para a conservación da biodiversidade através do voluntariado.

Os traballos a realizar por parte do voluntariado consistirán na identificación da flora exótica invasora presente na superficie do campus central da UDC (Elviña e Zapateira), cos obxectivos de elaborar un mapa de cobertura que amose a distribución de dita flora e de propoñer medidas de actuación para o seu control e eliminación, así como divulgar a problemática que xeran estas especies no medio natural. Outro obxectivo é que o voluntariado participante implique a outras persoas nas tarefas a desenvolver, redundando nunha mellor formación persoal e na concienciación da comunidade universitaria no seu conxunto.

Tamén resulta acaído dentro da universidade a realización de actividades de voluntariado ambiental arredor dos ríos. Estes traballos consistirán na inspección ecolóxica dos ríos, empregando a metodoloxía do Proxecto Ríos, que atravesan o campus de A Coruña. O obxectivo será achegar aos participantes á contorna fluvial poñendo en valor estes ecosistemas dentro da universidade. Unha vez realizada a diagnose propoñeranse actuacións de mellora para os ríos do campus da UDC.

O desenvolvemento do programa inclúe as seguintes actividades:
• Formación de grupos de voluntarios de estudantes.
• Investigación (monitoreo) de diferentes aspectos de biodiversidade e especies exóticas invasoras no campus.
• Inspección dos ríos que atravesan o campus da UDC.
• Propostas de actuación, con especial atención aos programas de custodia do territorio, a realizar autonomamente polo voluntariado.

Estas actividades están destinadas aos estudantes da UDC, pero están abertas a todas aquelas persoas que queiran participar, previa inscrición. Para realizala podedes anotarvos en:
e-mail: oma2@udc.es Telf: 981 167 050 ext. 5693 (Marta).
e-mail: pacobanhobre@adega.info Telf: 981 57 00 99 / 619 672 038 (Paco).